Drei alti Handballer ufem Kili


Bevor me überhaupt emol cha dört ufe laufe
Sött me no ganz vill Wandersache chaufe
Zwei Täsche, Schlofsagg, Schueh und e gueti Jagge
Alles andere uf dr Lischte muesch aber au no pagge

Voller Vorfreud gohts denn mol los, mitem Flugi zu de Afrikaner
Und im Hotel acho bisch nid ellei, es göhn au no es paar Japaner
Am nögschte Morge gohts los, öbbe 10 km zu de erschte Hütte laufe
Aber immer pole, pole, das heisst langsam, do muesch Di zämmeraufe
Sunnehuet, Tenue leger und die beschti Sunnecreme
Wanderhose, Hemmli und Schueh, no die ganz bequeme

Dure wunderschöne Rägewald, bi Sunneschyn und frohem Lache
Nach 6 Stund dobe acho, hesch no churz Zyt zum Chatzewösch mache
Nacheme lange Dag und guetem Ässe göhmer denn emol go schloofe
Ein pfuust schlächt, si heige Raucherstäbli azunde, d’Japaner, die doofe
Am säxi ufstoh, Morgenässe und los gohts über 3700 Meter ufe
Duur d’Steppe, vill drinke, so langsam chunnt me ins Schnuufe

D’Stimmig isch beschtens, mir nämes ganz locker
So schnäll haut uns nüt me vom Hocker
Jetz gohts no chli witer ufe, zum Aklimatisiere
Nei ’s het no niemer müese Suurstoff inhaliere
Dr Zebra Rock uf 4200 Meter isch jetzt vo allne erklomme
Lockers Uslaufe seit me däm, im Hintergrund dr Kili, mir sind benomme

Zrugg im Nachtlager gits wider vill Tee wo mir nie wänd misse
Schiints muess dr eint oder ander dur d’Nacht denn öfters go pi…
Nachem Konfibrot, Schwyzerchäs und Spiegelei mit Spägg
Putze mir no schnäll dr Porridge äwägg
’s nöggschte Ziel isch d’ Kibo-Hütte, 4700 Meter über Meer
Mir schliiche dur die ändlosi Wüeschti, habe fertig, Flasche leer

Obe acho, öbbis ässe, und ahneligge bis Mitternacht
Jetz gohts los, ’s isch chalt, aber lueg emol die Stärnepracht
Schritt um Schritt goht’s ganz langsam richtig Gipfel, ohni z’motze
’s git immer mehr Pause, mä duet sich regelrächt dä Hang uf cho…

Sächs Stund spöter gspührsch die erschte warme Sunnestrahle
Nur no es paar Meter, ändlig dobe,  si hei sich glohnt die Quale

Mir si glücklich und z’friede, mache Föteli und düen e chli fiire
Alli wo das au wänd erläbe, d’Empfählig vo uns, unbedingt usprobiere
Für dr TVA heimer au no chli Wärbig wölle mache
Und wie me ufem letschte Bildli gseht, mir chönne no lache
Das wär’s jetzt gsii, unsere chline Kilibricht
Es paar dänke bestimmt, die sin jo nid ganz dicht
Vor allem hei es paar dä küehn Gedanke
Si wänn im 2017 nomol dört ufe wanke

Marc, Ralf und Thomy